Sepemanjai 53 taun Sarawak
udah merdeka dalam menua Malaysia, mayuh udah pemansang ti diterima rayat ba
menua Sarawak kelebih agi rayat ba menua pesisir. Pemansang menua pesisir mai
tuju ti manah kena raban bansa di menua pesisir berubah ngagai renggang singkang
pemansang dunya moden sereta nambahka penatai pemisi pengidup sida iya ba alai
sida diau tauka di rumah panjai. Tuju iya, iya nya kena nentuka langgur
pemansang menua pesisir ke agi seriran enggau Wawasan 2020. Nyadi dalam menua
Sarawak, transformasyen menua pesisir ulih ngangkatka tikas pengidup rayat
laban pengawa ti majak ngemansangka menua pesisir tu disadang mai pengelantang
ngagai rayat menua Sarawak kelebih agi ngagai bansa Iban ti nyadi raban bansa
ti pemadu mayuh ba menua Sarawak sereta agi mayuh mengkang diau di menua
pesisir tauka ulu sungai ngambika sida ulih betapat enggau orang ti diau di
nengeri ari sukut penemu enggau pemandai napi dunya moden kemaya hari tu.
Kelimpah ari nya, siti ari gerim ke bisi digaga perintah
kena ngemajuka tauka meri transformasyen ngagai menua pesisir iya nya Gerim
Transformasyen Menua Pesisir tauka Rural
Transformation Programme ( RTP) ti nyadi fokus ketiga dalam Presentasyen
Bajet 2012 ke dipadahka Kepala Menteri Menua Malaysia ba taun 2011. Tuju gerim
tu dipejalaika iya nya nyadika siti ari gerim ke meri transformasyen ngagai
menua pesisir kena nyediaka peluang kereja ngagai peranak menua pesisir serta
bejalaika pengawa ekonomi.
Ari nya, Palan
Transformasyen Menua Pesisir tauka Rural
Transformasyen Centre (RTC) ditumbuhka nyadika palan kena bejalaika
inisiatif perintah ba baruh National Blue
Ocean Strategy 4 (NBOS4). Kesemua inisiatif tu dipejalaika ba RTC lalu
ngembuan endur 100km radius ari palan tu. Nangka ke diatu menua Sarawak semina
ngembuan 2 Palan Transformasyen Menua Pesisir iya nya ba Bekenu, Miri enggau
Betong. Enggau numbuhka palan tu ulih meri pengelantang sereta nikika tikas
pengidup rayat Sarawak kelebih agi ari sukut pelajar, ekonomi, pengelandik,
insfrastruktur sereta pengerai rayat ba menua pesisir ti agi kurang ari sukut
tu laban ti diau jauh ari nengeri.
Pelajar ba menua pesisir
Kena ngemansangka pelajar ba menua pesisir, dia perintah
bisi ngatur inisiatif kerejasama universiti dalam negapka agi kaul entara
nengeri enggau menua pesisir. Volunteerism
enggau Knowledge Transfer Programme iya nya pugu ngagai inisiatif tu. Gerim
tu dikena meri penemu enggau penau ngagai nembiak ba menua pesisir lalu ngadaka
raban bansa ke penemu kena nyapai objektif nikika tikas sosio-ekonomi raban
bansa luar. Entara chunto pengawa ke dipejalaika dalam gerim tu iya nya baka Health for Malaysia, Educate Malaysia enggau
Rural Ambassador. Nengah gerim tu,
rayat menua pesisir enda tinggal ari kena pemansang dalam pengawa belajar
lebih-lebih agi pelajar tu siti ari elemen ke beguna dalam idup kemaya hari tu.
Ari pelajar mega, rayat menua pesisir ulih nikika agi tikas pengidup sida kena
ngulihka kereja.
Nambahka nya, gerim ti dipejalaika
mega kena meri penemu ngagai orang menua pesisir kelebih agi orang ba rumah
panjai awakka sida nemu guna pelajar ngagai pengidup sida besehari-hari. Apai
indai di rumah panjai ulih meransang anak sida besekula lalu mujur bulih
pengawa laban ngembuan penemu senentang guna pelajar dalam pengidup kemaya hari
tu. Ukai nya aja, mujur dalam sekula mega ulih mantu peranak rumah panjai
ngangkatka tikas pengidup sida lalu sida enda tinggal ari kena empas pemansang
ti bisi ba menua nengeri.
Ekonomi
Ari sukut ekonomi, rayat menua
pesisir mayuh agi ngereja pengawa betanam betupi. Pengawa betanam betupi tu mih
nyadi ke asil ekonomi ngagai ruang bilik siku-siku ba menua pesisir. Dalam
nikika tikas pengidup rayat menua pesisir, dia perintah nengah Opis Betanam
Betupi meri bantu ngagai rayat kena sida ngemansangka pengawa betanam betupi.
Bala orang Opis Betanam Betupi bisi mekalka ngagai orang ke bulih bantu dalam
ngereja pengawa betanam betupi baka meri baja, sum, anak jelu baka manuk, ikan
enggau mayuh agi macham bantu ngagai rayat di menua pesisir. Enggau bulih bantu
ti baka tu tau meri penguntung ngagai rayat di menua pesisir ngambika sida
ransing ati deka ngangkatka diri sereta ngubah chara idup sida lebih agi baka
ke udah. Sida ulih ngangkatka tikas pengidup diri nengah mayuh macham chara
baka ngaga pengawa dagang ti mit dulu sebedau nyadi besai. Pengeransing ati
patut dikembuan sida enti deka maju dalam pengawa ekonomi tu laban ngembuan
mayuh penguji ti ditapi lebuh ngereja pengawa tu ketegal ti ngembuan risiko
tauka penusah tinggi enda baka pengawa bukai sekalika sida tau untung lalu tau
mega rugi.
Berindik ari nya, rayat menua
pesisir mega ulih minta bantu ukai semina kena sida betanam enggau betupi, tang
mega ulih minta mesin baka injin berau, injin padi, injin getah enggau ti
bukai. Kereban tauka mesin ti baka tu
ulih mai penyenang ngagai bala rayat lalu sida ulih ngasaika pemansang ari gaya
sida ngereja pengawa besehari-sehari sereta sida ulih nitihka singkang
pemansang betanam betupi moden kemaya hari tu. Ngambika sida nemu agi senentang
pengawa ekonomi dalam betanam enggau betupi, dia perintah nengah Opis Betanam
enggau Betupi patut meri kus senentang pengawa betanam enggau betupi ngagai
rayat menua pesisir ngambika sida enda sengapa rembang aja ngereja pengawa
betanam betupi lalu nengah jalai ti betul. Ari nya, sida ulih ngaga pengawa
betanam enggau betupi tu ba tikas komersial ti ulih mai penguntung ngagai rayat
di menua pesisir lalu bulih pemasar ari pelilih menua pesisir dia empu enggau
orang ti sebelah nengeri.
Ukai nya aja, ngaga produk tauka
asil betanam nyadi pemakai mega siti ari chara dikena ngelakuka dagang ba menua
pesisir. Nengah pengawa tu, pedagang dalam bidang begagaka pemakai ke nekanka
pemansang enggau nikika kualiti produk ngambika ulih didagang ba dalam enggau
luar nengeri. Pia mega, fokus mega ngagai aktiviti nilai tambah enggau
ngemansangka pedagang industri pugu betanam nasional (asas tani nasional) ke ulih nikika agi penatai pemisi orang menua
pesisir kelebih agi ke agi ngereja pengawa betanam betupi ngambika sida
ngasaika pemansang ti diberi perintah.
Insfrastruktur Menua Pesisir
Ari sukut infrastruktur, diatu menua pesisir ba menua Sarawak mayuh udah
bulih bekal ai, karan, jalai enggau bisi arus komunikasyen. Bekal ai pengambis
beguna ngagai rayat menua pesisir laban ai siti ari pugu pengidup ti pengambis
beguna. Perintah udah meri bantu nengah chara ngaga tekat ai kena nekat ai
awakka bulih ai ti beresi ngambika rayat di menua pesisir kelebih agi menua ba
ulu sungai ti tusah dilawa sereta enda datai jalai bulih penyenang tu. Ukai nya
aja, bekal karan mega bisi disediaka perintah ngagai rayat menua pesisir
ngambika sida ulih ngurangka bekenaka injin api tauka generator. Dalam meri bantu kuasa karan tu, perintah ngena meri
penatai kuasa karan tu enggau betikas nitihka menua ti senang dilawa kelebih
agi menua ti udah datai jalai. Penatai bekal ai enggau kuasa karan tu mega bisi
kaul enggau jalai alun ti ngaulka menua siti enggau menua siti. Ambika chunto
baka jalai alun ngagai menua Kapit ti benung digaga diatu ngenyenangka agi
orang ngaga tiang kena mekalka kuasa karan ngagai menua pesisir kelebih agi
orang rumah panjai ke agi begunaka injin api ba rumah sida iya. Nengah bekal
kuasa karan tu, rayat menua pesisir ngasaika penyenang lalu ulih ngelimatka
belanja sida bebelika minyak injin api ti begunaka kus ti mar agi enti
dibandingka enggau ngena kuasa karan.
Ukai semina nya aja, diatu Projek Pan Borneo ba menua Sarawak benung
digaga lalu dipelabaka tembu dalam taun 2022 ila. Projek Pan Borneo tu mayuh mai penguntung ngagai menua Sarawak kelebih agi
rayat ba menua pesisir ti beguna jalai alun kena sida ngelawa siti-siti endur
lebuh bisi pengawa ti beguna. Ari projek tu mega, peluang bekereja ti disediaka
dipelebaka dalam penyampau 400,000 kereja ti baru. Utai ti baka tu ulih meri
peluang bekereja ngagai rayat menua pesisir lalu sida enda kiruh begigaka
kereja ngagai menua luar laban sida ulih kereja enda jauh ari menua lalu ulih
nikika tikas pengidup sida sebaka enggau orang ti bukai.
Jalai alun ti ngaulka menua pesisir enggau nengeri ulih mai pemansang gaya
idup ngagai rayat menua pesisir. Kebuah pia, laban rayat menua pesisir ulih
muka runding sida iya ngubah chara idup sida ngagai tikas ti tinggi agi nunda
orang ba nengeri ari sukut pelajar enggau penatai pemisi sida. Ari nya sida
ulih ngatur lalu merambu kediri empu ngangkatka tikas pengidup sida kelebih agi
mayuh infrastruktur ti udah disediaka perintah laban deka ngubah tauka meri
transformasyen ngagai pengidup rayat menua pesisir ngambika pengidup sida nadai
jauh bida enggau orang ti diau ba nengeri.
Pengelandik
Dalam nyediaka peluang bekereja ngagai rayat menua pesisir, dia Menteri
Pemansang Menua Pesisir bisi mantu rayat menua pesisir enggau nyediaka peluang
ngelatih diri bekereja ba Palan Transformasyen Menua Pesisir (RTC) kena
nambahka penemu, pengelandik enggau pengulih diri ngambika ulih nambahka
penatai pemisi, peluang bekereja enggau tikas pengidup rayat ba menua pesisir.
Ba palan tu, pengelandik dagang dikemeratka agi laban rayat menua pesisir
ngembuan mayuh asil ari tanah sida baka buah, sayur enggau ti bukai lalu sida
belajarka chara nyual pemakai nya ngambika ulih dikomersial ba endur ti bukai.
Ari nya sida ulih nambahka agi penatai pemisi sida empu nengah dagang ti
dipejalaika sida kelebih agi dalam industri pugu betanam. Dalam latih nya mega,
sida bisi diberi latih chara mungkus enggau meri nama, presentasyen produk,
ngatur pemakai utai tupi enggau
pengelandik ti bukai ke ulih dikereja rayat menua pesisir. Ari latih tu, sida
ulih nemu mayuh macham chara sida ngatur ekonomi diri empu dalam bejalaika
pengawa betanam betupi awakka duit ti dikena sida ngatur belanja bejalaika
pengawa betanam betupi enda tebasau pia aja.
Kelimpah ari nya, pengelandik abi jari (kraf tangan) mega siti ari
pengelandik ti ulih nambahka penatai pemisi rayat menua pesisir. Mayuh perengka
abi jari ke ulih narit ati orang menua luar meli baka ngaga bakul ari rutan,
tangui, baju burung, pua kumbu, ketapu enggau mayuh agi rengka abi jari ti
bukai. Enggau nya, dia Palan Abi Jari (Pusat Kraftangan Desa ) ditumbuhka ba
endur menua pesisir ke landik ngasilka perengka tu. Nengah palan tu, dia rayat
menua pesisir ulih ngasilka mayuh macham rengka abi jari lalu sida ulih
ngelakuka barang ti digaga sida nengah dagang komersial ngagai menua nengeri.
Berindik ari nya, sida ulih ngasilka siti penatai pemisi ke ulih nambahka
penatai ti bukai kelimpah sida ngereja pengawa betanam betupi. Tu siti ari
transformasyen ke udah digaga perintah nengan Menteri Pemansang Menua Pesisir
kena ngangkatka tikas pengidup rayat menua pesisir ti agi mengkang ngereja
pengawa betanam betupi sida.
Komunikasyen
Dalam pemansang globalisasyen tu,
teknologi pemadah enggau komunikasyen amat beguna ngagai siku-siku kitai.
Komunikasyen amat beguna ngagai rayat kemaya hari tu kena begigaka lalu ulih
bekaul enggau panga diri. Ari nya, dia perintah udah ngaga mayuh endur ba menua
pesisir diatu udah bisi arus telefon dikena sida berkomunikasyen enggau pangan
diri. Arus telefon tu amat beguna kemaya hari tu laban ulih mantu kelebih agi
lebuh maya bisi penusah. Ambika chunto, baka penusah angus ti suah nuntung
rayat rumah panjai sida ulih telefon ngagai bala Bomba enggau lengkas ngena
telefon tekala nya. Nambahka nya mega, dunya nadai sekat (dunia tanpa sempadan)
kemaya hari diatu nyau makin dikena bala nembiak redak baka Facebook, Whatsapp, Intagram, Wechat enggau
mayuh agi macham aplikasyen ke dikena ngaul pangan diri kemaya hari tu. Nengah aplikasyen tu, dia rayat menua
pesisir enda tinggal ari kena pemansang teknologi pemadah enggau komunikasyen
ti sebaka enggau orang ba nengeri. Rayat menua pesisir mega ulih nemu mayuh
macham informasyen enggau berita kemaya hari tu nengah telefon sida aja baka ke
disema dunya ujung jari aja.
Seninjik enggau nya, dalam ngasaika
pemansang teknologi pemadah enggau komunikasyen tu, dia perintah mega bisi
nyendiaka Kampung Tanpa Wayar (KTW) ngagai
menua pesisir kelebih agi rumah panjai udah bisi ngembuan pemansang ti baka tu.
WiFi ti disediaka perintah tu ulih
mantu peranak rumah panjai ngasaika pemansang teknologi komunikasyen ngambika
sida ulih bekaul enggau dunya luar nengah WiFi
tu. Ukai nya aja, peranak menua pesisir mega ulih ngisi pom kereja nengah WiFi ti disediaka ba rumah panjai tauka
genturung sida diau laban diatu ngisi pom minta pengawa perintah mayuh begunaka
sistem online kena minta kereja ba
siti-siti endur kereja perintah kelebih agi nengah Suruhanjaya Perkhidmatan Awam (SPA) enggau minta masuk Institut
Pelajar Tinggi baka Institut Pematih Pengajar (IPG) enggau universiti ti bukai.
Ari pemansang tu, dia bala nembiak ba menua pesisir enda kiruh ke nengeri ngiga
endur ke bisi WiFi tauka internet
ngisi pom minta pengawa tauka ka minta nyambung belajar baru. Pemansang ti
diasaika tu mih ke ulih ngangkatka tikas pengidup rayat menua pesisir ngambika
ulih muka runding sida ngubah gaya pengidup sida ti agi tinggal ari orang ke diau ba nengeri
kelebih agi ari sukut pelajar sida ulih nyulut agi ari ke udah. Ari nya, dia
kitai ulih meda baka ni rayat menua pesisir ulih nerima transformasyen ti
diberi perintah ngagai sida ngambika sida ulih meransang diri empu enggau ruang
bilik sida maju sereta lantang dalam pengidup sida besehari-hari.
Nyadika simpul, transformasyen menua pesisir ulih ngangkatka tikas
pengidup rayat ba menua Sarawak kelebih agi rayat ba rumah panjai ti agi
mengkang enggau daya idup sida iya empu. Kena nyukung transformasyen ti udah
diberi perintah nengah mayuh macham bantu, dia rayat menua pesisir patut muka
runding sida sereta ngembuan juluk ati ngembuan pengawa ke tetap baka
gawa perintah ngambika sida ulih sebaka takat enggau orang ke diau di nengeri
ti udah mayuh bulih pengawa ti menyana enggau meruan baka doktor, injinir,
pengajar, pulis, arkitek enggau ti bukai. Transformasyen menua pesisir dikarap
ulih ngubah tikas pengidup rayat menua pesisir ngambika sida ulih napi chabar
ti deka datai lalu ulih nyapai juluk menua maju maya taun 2020 dalam kandang 4
taun agi. Kena napi juluk ati tu, dia rayat menua pesisir patut berubah ulah
ari gaya runding ti deka bepekit enggau orang ukai nganti bantu ari perintah
aja kena ngemansang diri awakka sida ulih nitih gaya pendiau pengidup orang ke
udah nyulut baka sida iya.
Enggau selampur, perintah patut ngemeratka
pemansang menua pesisir laban transformasyen nya beguna kena rayat menua
pesisir enda tinggal ari bulih singkang pemansang baka ba nengeri. Kebuah pia
laban kena neguhka agi gaya pendiau pengidup rayat menua pesisir ke dudi hari
ila. Nya mih dia semua orang sekalika perintah tauka rayat nya empu patut
semampai ngaga pengubah ke manah ngambika sida enda dikumbai raban bansa ke
tinggal ari singkang pemansang dunya moden kemaya hari tu lalu patut nyeliah
pemereti politik siku-siku. Nambahka nya, nembiak ke rebak baru tu patut
ngembuan pikir ti deka ngemansangka diri lalu deka nyulut ari orang bukai
sebela enggau orang ke diau di nengeri. Kena ngujung ke iya, dia saup ari semua
orang beguna ngambika pemansang ulih dipejalaika nadai sebarang penanggul ti
datai nuntung awakka ulih mai pengelantang ngagai rayat dataika dudi hari ila
nyentukka telesak ti deka datai. Sarawak maju dalam Malaysia! (309
leka jaku)
Kereban
Sanding
Kementerian Kemajuan Luar Bandar dan Wilayah. (2010). Pelan Induk Pembangunan Luar Bandar. Kuala
Lumpur : Kementerian Kemajuan Luar Bandar dan Wilayah
RTC Betong beri manfaat kepada penduduk luar bandar. http://www.theborneopost.com/2016/04/07/rtc-betong-beri-manfaat-kepada
penduduk-luar-bandar/
Diseleti maya 27 Julai 2016
Pembinaan di bawah program Pusat Transformasi Luar Bandar
dijangka bermula hujung bulan ini. Objektif
Pembangunan Luar Bandar. http://www.rurallink.gov.my/objektif Diseleti maya 8 Ogos 2016
Pusat Transformasi Luar Bandar. http://www.rurallink.gov.my/usahawan/pusat-transformasi-luar-bandar-rtc/ Diseleti maya 10 Ogos 2016
Kerajaan Pusat Akan Bantu Rancakkan Pembangunan
Luar Bandar di Sarawak. http://www.theborneopost.com/2015/03/24/kerajaan-pusat-akan-bantu-rancakkan-pembangunan-luar-bandar-di-sarawak/#ixzz3hC4RY4sp Diseleti maya 8 Ogos 2015
No comments:
Post a Comment